貽興先生︰
其實我的故事都是大同小異，在你的文章中已不知看過多少次相似的情節，不過人總是會當局者迷，亦由於我是小三身份，需要找你這位比較容得下我這種身份的人來給我一個當頭棒喝。
一年前我同一個各自有同居的另一半的A 一齊。我從來不是道德規範者，我並唔係認為做人第三者可以理直氣壯，而且四角關係我的確係是錯，但我必須對自己坦白，我並唔係為他人的眼光而活，有些事情發生了就是發生了，逃避不是一個合適的解決方法，亦唔係大家唔講唔提就可以無事發生。
其實同佢一開始時的確無特別的諗法，可能各自同各自的另一半欠缺的部份大家都可以係雙方身上搵到，自自然然咁就走埋一齊。既然仲年輕，既然自覺承擔得起，一開始的確只為大家開心就算。不知不覺一年的相處及付出，大家都知道大家都認真咗。剛開始我自覺呢個轉變時我決定停場離開，但佢唔明白佢唔想放手，自己又心野心軟想繼續落去，到最後我衰女地希望坐正。
我承認我哋都係做錯的人，但其實每段感情有問題時雙方總是有些責任同原因，除非存心為咗尋開心。我選擇咗A 而唔係男朋友，而我亦知A「選擇」咗我而唔係女朋友。
其實A是一個對感情拖泥帶水的人，要坐正好難，但認真咗要繼續三個人的關係更難，完全放手離場我已經做唔出，所以我迫佢做決定，迫佢放棄女朋友。點知，原來佢女朋友知道咗我的存在，是什麼原因都好，佢女朋友選擇容忍只求A 識返屋企。佢估唔到女朋友竟然連底線過埋都忍氣吞聲，所以唔忍心再傷害佢，所以佢地分開唔到。
其實我好明白唔係人人做得出忘恩負義、貪新忘舊、見異思遷呢種冷血行為。原本我打算算數走人，但我又唔死心，因為我覺得佢地已經早有問題依家仲要有條刺其實遲早爆煲。
我有諗過繼續同A糾纏等佢女朋友忍無可忍，但我做唔出，一來的確良心問題，二來咁樣爭到的關係亦已經變咗質。其實好明白應該放手等待時間決定，等佢哋自己處理，但A是一個對感情拖泥帶水的人，我知我走佢又會有排拖。
如果佢選擇佢女朋友，我必須離場，可恨佢終於肯面對時又再出現一個令佢唔忍心的理由，佢地問題依然存在所以我放唔到手。希望你能鬧醒我應該點做？
又一個小三
又一個小三：
其實對你這個小三真的沒什麼要罵，只因為，你已是那些小三裡相對清醒的一個。
只是有時候明明理智清醒還要繼續，這種人頑固起來，總比那些衝動愚昧的小三更執迷不悔。
其實你也很清楚，A 這個男人只是用來補足你跟男友不足之處的那塊小砌圖，他不可能給你一幅整全的幸福圖景，而他的心軟與花心也不可能是個好男友的料子，所以即使你陰質事做盡，迫到他的正印女友傷心離場又如何？這種根基腐爛、氣數早盡的王朝，給你坐正了又如何？你犧牲付出抓爛塊面壞事做盡，只爭得一個這種素質的男人，如果我是你，如果真的非做不可，我希望你可以為一個比較值得的男人這樣做，至少，你不會得到後才來後悔，後悔自己幹嗎為這種水平的男人下地獄。
所以，既然你那麼清醒，我不妨告訴你，像你這種小三最理想的做法是怎樣呢？就是離開這個A，繼續跟男友一起，直到下一個比較值得的男人出現，一切理想，才疊埋心水跳船，這樣，對你對任何人都比較好。
反正，如果我勸你連男友都分開，好好整理自己，回復單身才迎接下一個，那麼害怕單身又缺乏安全感的你，一定不可能做到的，對吧？
祝 食大茶飯
貽興
