搶他回來 – 覆煩惱人

我地去左餐廳食野，唔知點解，大家好似一見如故，一D隔膜都冇，一傾就三個鐘，感覺不錯，自始之後就成了現實中的朋友。

往後的日子都是各有各忙，間中都有出黎食飯、傾ICQ。其實當時我已對他有意思，仲曾經對他示愛，不過當年佢冇接受我，之後我地繼續保持朋友的關係，而時間耐了，我都冇再諗那件事（暗戀）。

我地大家都有寫網上日記的習慣，由最初的showhappy、xanga直至依家的 facebook，我地都 keep 住支持對方的日記，仲不時會留言。我覺得好難得有朋友會支持咁耐，本來我寫網上日記的原意是同朋友分享生活點滴，但日子耐左都會期待佢的留言。

呢幾年大家都有keep 住見面，好多時都係佢約我。佢亦有拍拖，每次出黎食飯，每當佢有愛情煩惱，我都會擔當佢的愛情顧問，為佢排難解擾。

2007 年，我去歐洲旅行，佢知道之後，主動搵左好多租車/ 酒店的資料 email 比我。我覺得好開心有一個咁關心自己的好朋友。

佢每年都會同我慶祝生日。上年中秋時，我地出來食飯，佢送了一盒月餅比我，言談間佢話覺得我著修身褲應該幾好睇，問我幾多腰圍，我講左比佢知。之後大家就傾第二d 野。

有一次我公司同事有 gathering 去唱K，咁岩我同佢 MSN，咁我咪問佢好唔去，因為我在港島區返工，而佢在九龍工作，住新界。點知佢話唔介意黎港島，那晚都好開心。但後來我D同事話，呢個係同事gathering，話A 先生都唔識我D同事，佢都肯黎？又問我點解會搵個異性朋友黎join？

有一晚我地去了一間酒吧飲野，因為我家有d事，我要成10點先出到去。當時佢放6:00，我叫佢返家先，之後再出。佢話佢有方法打發時間，原來佢只係坐在那 M記等成幾個鐘。我知道之後都有D 感動，那晚都是大家傾下心事，飲完都成凌4點。佢送了我回家，之後我返家收到他的 email，佢話什麼「酒逄知己千杯少」等等的說話，唔知點解睇完封email 之後，我好唔開心，始知道原來我仲對他有感覺，根本未放低過，只是一直放心中。

上年10 月，我地約左去酒吧飲野，係清吧，因為大家都喜歡出黎傾下計，飲少少酒，聽音樂 relax 一下。唔知係咪大家已經太熟的關係，有時我地都會試飲對方那杯飲品，用同一枝飲管，而且又會坐得好近。講真，那刻的感覺好溫馨。

點知傾傾下，我飲多左，有少少醉，但仲係清醒的，但就有d暈。我同佢講，我想伏下休息一陣。佢話好，叫我好好休息，佢自己玩下電話消磨時間。我伏在桌上，把臉擰去另一面，其實只是合上眼，唔會訓得著。無幾耐，我 feel 到佢撫摸我d頭髮 （我有一把好長的頭髮）。佢只是撫摸我的頭部，一下一下咁，就好似哄BB 仔訓覺。

當時我好驚，但又好warm，唔敢起身。冇幾耐，我聽到好近影相的聲音，我下意識覺得係佢影我相，我問他仲咩影我相（我當時的衣著好密實，而且穿褲，應該不會走光），他有點緊張，話好黑，沒有影什麼，亦不會放上fb 。

當時的氣氛很浪漫，大家也情不自禁擁著接吻起來，我問他知唔知我鍾意佢，佢話是好耐之前的事啦，我坦白承認對他仍有感覺，我只係想知佢有冇喜歡我，佢話有，但係 timing 問題，而且佢有女友，不能一腳兩船。

我不是要他做我的男友，知他有喜歡過我，已經好開心。我地擁著對方，我知道之後會好尷尬，所以我話以後大家唔好再見，佢話唔想冇左我呢個朋友，但會尊重我，當時我係第一次見到佢眼有淚光。

有時大家也會出黎睇戲，佢真係好細心。我覺得冷時，個身坐不定，佢會立即feel 到，問我係咪凍，即刻拎條頸巾幫我戴。

臨近除夕，佢同班朋友搞了一個 party。佢話女友不喜歡他那班朋友，於是邀請我join。那晚我覺得好開心，因為沒想過可以同佢一齊過除夕。不過有時佢女友打比佢，佢會示意我不要出聲，搞到我唔知點咁。完左party之後我回家，佢叮囑我回家後要致電給他。由於我在車上睡了，miss左佢3個call，佢send message 比我「 call me pls」。我知道他真的很關心我！

之後我地真係有一段時間沒有聯絡，直到今年初，我生日，佢話同我食飯，我已經用不繼搵籍口推佢，但佢每隔一段時間又問下我，於是我都係出左去，大家好似無事發生咁。

佢送了一條修身牛仔褲比我，我記起是上年中秋佢問過我腰圍，我無諗過佢會記住，仲送比我。由於條褲過長，佢仲同我一齊拎去改。之後佢 keep 左張單，話過幾日幫我拎。之後佢真係幫我拎，佢仲話拎去邊到比我都OK。因為工作忙，未可以準備放工出去，佢仲專程拎去我公司樓下比我。

之後幾星期我工作好忙，加上有心事，想以工作麻醉自己。在公司 OT 到成9:00。我開住 MSN 工作，又見到佢用手提online。大家傾左一陣，佢知我有心事，話可以出去同我傾，問我意願如何，如果我想搵人傾，佢可以陪我，否則我選擇回家休息也可以。我沒有答覆佢，於是佢話佢坐在公園等我決定，我最終也出了去。

我知道自己唔應該成日見佢，因他有女友，但有時又控制不到。而且我知道他以前會講比女友知同我出街，但依家會隱瞞，佢話唔想女友多野諗，又話唔想因為女友而冇晒朋友。

早前我完旅行，買了手信比佢，我同佢講我想遊電車河，佢都會滿足我，專程出來港島，大家食完飯又會 share 一杯雪糕食，大家坐在公園，你一匙，我又一匙，個 feel 真係好 sweet 。

佢話佢當我是知己，有時我真懷疑知己係咪可以咁 close，我覺得佢做的野又不是對待知己咁。我真係不明白佢在想什麼，是不是我自作多情？我一直同自己講大家是朋友，但我d fd 話我地的關係早已不是朋友般，我真的不知如何是好。我不想沒有他這麼好的一個朋友，但又驚自己控制不到自己的感情。

我覺得，他雖然有女朋友，但總能分出許多時間與你相處，又真心關心你。看來，他對你的好感程度，及得上他對女朋友的喜歡程度。

那些性格比較狠的女人，早已搶他到身邊了，長線發展又好，短期作樂都好，都叫做試過這個男人，一嚐心願。

在酒吧的那晚，是最應該發生事情的，但你又太理智。

我猜，你的心態是，希望他首先與女朋友分手，然後正式追求你。正正式式，光明正大那樣。

現實中的男女關係，靠的是桃花機緣。你掌握到那一刻黃金桃花機會，這個男人自然就會進入你的生命，改寫了你、他、他的女朋友的愛情命運。

你問心，你真的喜歡他的話，你就要為自己的愛情幸福。搏一舖。把這個男人搶回來。

當然，要是你不太喜歡他，那麼就算了吧！繼續做對曖昧好知己囉！

男女關係上，沒有正派反派之分。縱然你做搶奪的那個，只要在以後的日子，你和他幸福快樂，就可以了。

要是，你搶走他之後，發現只能短期拍拖，那麼，都叫做了卻一次心願。