貽興︰
你好！我有一個大難題，希望你可以替我解答。
我今年32 歲，有一個拍了拖一年的男友，我哋一齊咗無耐佢就同我求婚，而我亦一口答應，因為我都係一個恨嫁的人，都好想快d 結婚生仔。
但其實一路以嚟我都唔愛佢，我只係覺得佢條件好，又ready 結婚，why not？久而久之我就成日發佢脾氣，講埋晒d 傷佢自尊嘅嘢，令佢好唔開心。最終，佢話不如唔好plan 結婚住，因為佢唔sure 亦好擔心我地相處唔到。
我知而家呢個局面係我自討苦吃，但我真係有少少後悔。我知佢係100% 真心愛我，係我嘅難頂性格令佢擱置結婚計劃。我地而家嘅狀況係淡淡的情侣關係，佢話唔好再提future，我一提佢就覺得好煩好大壓力，佢叫我比時間佢，我問幾耐，但佢話佢都唔知。
其實你話佢點先會有返信心同我結婚？而我又可以做返d 乜去補償又或增加佢自信同減少佢對結婚嘅恐懼？
其實佢係一個好無自信嘅人，亦曾婚姻失敗，而家亦正見緊社工，想解決佢心理的恐懼同埋童年陰影，佢話等佢攪掂佢自己先，其他嘢佢唔想諗住。
你覺得我同佢仲有無將來？定係你覺得我應該放棄？你又覺得女人嫁比一個佢唔愛嘅人會唔會開心？
佢錢唔多，憨直好人一個，對我好同埋好loyal，呢d 係佢賣點。
自己攞嚟衰
自己攞嚟衰：
你的名字真的改得無錯，一切都是你自己攞嚟衰的啊。
其實你幹嗎要他重拾信心跟你結婚？從你行文看來，你一開始都只是恨結婚多於恨跟他結婚，你只想有人要，但不想給他要，這是你矛盾衝突的源頭，也是你何以一直不珍惜，到沒有了又來後悔，一再拿石頭砸自己腳的原因，如果你很愛他，如果你真的很想嫁給他，你哪會這樣做？
為結婚而結婚，最後只會離婚。結不成婚已經是你最好的結局，我知道此刻你一定會因為自己結不成婚而氣惱悔恨，但我告訴你，即使他肯娶你肯嫁，你們也頂多幾年貨仔，最終也定必離婚收場。那時候你想想，你扛著一個失婚婦人的頭銜慘一點，還是沒結過婚的女人更有巿場一點？
要是你欠缺足夠視野與智慧，上天不如你所願，有時候不是害你，反而是在幫你。很多女人像你，根本就不愛那個人，不過是時間適合，對方條件好，結婚？why not？結果，就是這句why not 害死了自己，你知道嗎？真正能夠輕鬆講一句why not 的人都是nothing to loss 的人，而你，像你這樣的女人，根本就輸不起。
你可以繼續恨嫁，等人要，但不一定是眼前這個人。你對婚姻的理解極其貧乏扭曲，假若繼續這樣下去，即使他日你有幸成功出售，脫離你一直驚懼的敗犬行列，你也不可能把婚姻成功經營，不為什麼，只因為你一直以為結婚是一種人有你有的儀式，一種把血塗在門楣上就能逃避瘟神的避邪行為，而這種盲從的婚姻觀念，只會令你嫁得出也不可能嫁得對，更遑論幸福快樂。
祝 腦囟生埋
貽興
