A與B – 覆蔷薇

A 是我心目中一直想要的類型，性格和價值觀都相似，但沒有愛情的感覺；B 是我最不喜歡的類型，性格和價值觀有好多衝突，一開始就知唔太夾，但有戀愛的感覺。

B 做左好多係我一直都想男朋友會做o既野，有感動的，有驚喜的，識了B 個幾月，在他強烈的追求下我接受了B，一反我好慢熱o既性格，呢個時候，亦終於等到A表示好感，但係已經過o左我最想了解佢同想發展o既時候。

同B 一齊最初我都係唔鍾意佢o既性格，但好欣賞佢玩得又做得o野，最開心o既係我可以做番自己，我亦因為B發現o左我o既性情，而且佢大男人，我都好有被人照顧o既感覺，好溫暖，不過又因為性格同價值觀o既問題，有好多衝突，成日理論，亦係因為佢大男人（係優點亦係缺點），佢好想要個小女人，但我唔係（我有時好專制），因為佢唔想我唔開心，好就我，但係佢話佢有時做唔番自己。

3 個月未夠我成日話分手，分手之後，大家都掛住大家，佢一次又一次同我調解，不過大家總係要鬥氣唔想妥協。最近我提出冷靜1個月，B 唔想，而A
又響呢個時候出現番。

從朋友口中知道A原來都鍾意我，雖然我唔知點解佢唔積極又好慢熱（識左9 個月了）。B 令我好有被人疼愛同女皇o既感覺，好童話，而因為無同A開始過所以我唔知係唔係我諗咁大家性格好夾，但我知同A一齊我唔可以做女皇。

我唔係要趕結婚，亦無想咁早結，不過都27了，仲係唔知自己想要咩。B 的家底好D，A 就係小康，B 可以用錢做到好多o野，佢都好捨得洗響我身上；A
講心意。我以為自己唔會睇「錢」，原來我都現實。

阿A 根本無追你，你又不會追求他。

我從來不信朋友傳遞的說話，雖然朋友話 A 都鍾意你，但他從來無追過呀！所以，你無需考慮，除非，你自己去追他。但你又不會啊！

其實，你知不知道你在想甚麼？你根本已經覺得 B 是更好，縱然大家有不合拍之處，但你喜歡 B 的程度，遠遠超過 A 。

你自己都識講，B 有多些錢，又當你是女皇；A 在表面上可能與你協調些，但有時候，你未與他真正拍過拖，你不會知道真相，況且，你說他無太多錢，又不會視你為女皇，那麼，倒頭來，就算你與
A 拍拖，你都會回到 B 身邊。

你這種情況叫做貪心，得一想二。你已有 B 了，卻心癢癢想試試與 A 拍拖。

與其幻想自己有兩個男朋友，不如想想如何營造與 B 的關係。我覺得 B 一直以來都肯去經營你們的愛情，是你嫌來嫌去。

深雪覆