你愈管他,他就愈反叛 – 覆Alice

你好。他是我的初戀,一起快三年了,他一直對我很好,除了會犯一些天下男人都會犯的錯。每次我發完脾氣都會笑著原諒他,但上幾個星期我發現他有一晚失蹤找不到人,不是工作太累睡著了,原來真相是返大陸、那刻我真的很生氣,狠下心腸說、結果他很害怕,一直求我,我下咗啖氣之後決定原諒。

原本這幾星期相處得都幾好,但昨晚佢有朋友生日要去飲酒,問我去不去,我拒絕了,我覺得既然去玩就應該要有空間,不過就要求佢三點要返到屋企,佢都話兩點多就會走。佢去到也一直有同我wtsapp,兩點半話切完蛋糕就走,之後一直冇回應,我再打俾佢電話已經唔通,打到三點半終於聽,話搭緊車返緊嚟叫我唔好嬲,咁我一直等,等到四點幾見佢仲未返到又再打,又係唔通,照道理尖沙咀返嚟一個鐘都唔洗,等到五點,都係未返。

我真係好失望,一怒之下剪斷佢新買既鍵盤滑鼠線,連佢最寶貝既公仔都剪爛埋。最後佢六點幾wtsapp 我話醉咗,叫我開門俾佢。

返到嚟佢望到隻公仔爛咗好嬲,我問佢去咗邊佢竟然話醉到喺街到坐,我望佢電話見到仲有電,覺得多數係刻意熄電話,再睇到佢同個朋友信息內容,佢真係三點幾就走左,但有幾個鐘去咗邊呢?唔通真係喺街坐?

到夜晚等佢放工返嚟,我嘗試同佢好好傾咗,但佢仲係好嬲,仲叫我死返自己屋企。

好多朋友都叫我,唔好再浪費時間係佢身上,但始終三年感情,講就容易,我應該要點做?要放棄三年的感情?

Alice

Alice︰

他返大陸那次,你發火,好合理。

但這次,他和朋友玩,喝多了,想繼續盡慶,你卻發癲,破壞他的擁有物,他當然會反擊。

說真的,他只是個後生仔,貪玩、想跩跩,都好正常。

你明白嗎?你愈是管他,他就愈反叛。你要求一,他就做二。

這一次他反擊你,甚至要求,其實好合理。一對戀人,相對流流長,你總不成每次管不著他也破壞他的擁有物。你這種行動野蠻而專制。

本來,他不守諾言是他不對,可是,你做破壞王,就變成你不對。你已由上風變成下風。

這一次,你唯有死死氣認低威,告訴他你會懂事、成熟,不會再胡亂破壞他的物件;也不會再管束他,你會給大家自由,但就需要大家答應對方,自由不代表可以出軌。

你的男朋友可能是個反叛男生,而他會希望,有個給他自由、能體諒他、有些少縱容他的女朋友。

做女人,要懂得「縱」男人,不是叫你任他去滾,而是,在忠誠專一的情況下,給予男人合理的自由度。

若然他今次趁機飛掉你,那麼,你下一次,就別太管束你的新男朋友;又或是,揀一個非常乖仔的,不愛蒲不愛玩不愛上東莞。

advertisement
Something is wrong.
Instagram token error.
Load More