有錯過冇愛過又能如何 – 覆Kelly

貽興︰



你好。客套話不說了,這是我第一次寫信給你。經過多番爭扎終於忍不住問你意見,請快覆我!

我25 歲,未拍過拖。大約一年前,有位A 先生追我,我對他有好感,但我知他同時追緊另一個女仔,而我也無意聽聞他有女友(他唔知我知),所以我就告訴他。

我冇咩興趣拍拖,叫他找些想戀愛的女仔。我以一個朋友身份和他心態和他共處,我同自己講對他愛理不理好了,玩吓可以,但佢未吸引到我去玩。

但係好奇怪,因為我計過佢放假d 日子,佢只可以約到我同另一個女仔,根本冇時間再約佢個所謂女朋友。

但後尾有一段時間,佢差唔多日日主動打比我傾電話,維持了個多月。佢會同我講佢以前d ex 嘅嘢,咁我都會話你咁想拍拖追返人囉,仍然以冷淡的方式對佢。

其實我好想問佢究竟冇拍拖幾耐?點解以前要同人哋講有女朋友?但係如果我開口問,佢就知我緊佢。

出街嘅時候,佢㩒電話,我睇到d 通話記錄全部都係我,d fb 記錄行踪全部都係我同佢去過嘅地方!

但我好清楚佢之前同時追我同另一個女仔,其實仲有一個,但係嗰個淨係send 過短信同食過一次飯(食飯係佢後尾話我知),所以我都唔知佢算唔算賤男,定係男人都係咁?

我有些男性朋友,佢地自問係認真的人。有一個新識的女仔,第一個月盲嘅都知佢想溝佢,但第二個月女仔同其他人拍咗拖,d 男人好似冇嘢咁,好快又下一個目標!

佢最近冇再日日打比我,佢之前有透露過我唔緊佢,我唔知點好。之前都試過好似失咗踪咁,我就會諗佢一定係識咗新女。雖然最後知唔係,但我知因為我哋初相識時巳經比唔到信心我。

我問你即係我要認係緊佢,其實點解自己冇拍過拖,(但)係每次都發現對方心裡唔只我一個?我用咩心態對佢好?

Kelly

Kelly︰


賤男這個詞彙如今已經氾濫成災了,幾乎到了只要追過一個女仔沒有結婚便得被扣上賤男帽子的罪名,但你的這個A 君哪裡賤了?你們不是情侶關係,他同時追求另一名女子,這就算賤男?那麼同時接受不同男生追求,還沒揀定的女生又該叫什麼了?

Kelly,我好想跟你說,愛情和面子有時候真的不能並存,你又想姿勢有型,又想人家拜倒你石榴裙下,不想被對方知道你著緊,當對方怪你不著緊時你又手足無措,像你這種死要面子的女生,有沒有擔心過將來怎辦?

需知道在這樣的一個城巿裡,如果你想繼續保持有型的姿勢,就得有一定的條件,特別是外在條件,才能繼續支起雙手扮酷扮矜持扮有型扮不著緊,問心,這樣的條件你有嗎?

你一直沒有拍拖,也許就是因為你一直在心態與行為上的偏差令你永遠無法埋門入波。太多的矯飾與偽裝令男生對你卻步,你口口聲聲說對方不能給你信心,那請問你又有沒有給對方信心?如果沒有,戀愛是雙方的事,那憑什麼你覺得對方必須給你信心但你就不必給對方一點安全感?請問你這方面的驕矜與高傲是從何而來的?

此刻對你來說,最重要的不是對他該用什麼心態,而是如何調整自己的心態。再繼續用這種口是心非、高高在上的姿態對待異性,我肯定再有多少合適的男人出現,你也可以全部錯過,有錯過,冇愛過。

祝  少做少錯

貽興

advertisement
Something is wrong.
Instagram token error.
Load More