合適的對象不是天跌下來給你的 – 覆唔想咁樣,可以點樣呀:D

貽興︰


請問一下好男人到底在哪裡呢?怎麼感覺好男人這三個字都只會出現在別人的男友/老公身上喔。好好奇,自己到底有什麼問題,為什麼總是沒遇過好男人。
 
我試過好幾年去耐心等待好男人的出現,可是就跟六合彩一樣,連個安慰獎也沒有。我努力保持皮膚質數(素),努力鑽研化妝,努力控制情緒,努力付出,努力學習廚藝,努力研究床上秘笈。但到頭來,每次吸引到的男人,都會很快地離開我
 
男人唔係都鐘(鍾)意個樣?個性?嗰入得廚房,出得廳堂嘅人架咩?我覺得自己先天不足先會成日被人飛,所以一直以黎都以後天去補救,但係搵黎搵去都搵唔到解決方法,所以特別喺呢度寫信向你請救(教)。


我記得我上上個男朋友(維持大概3 個月)一直以來都無鬧交,我以為佢好愛我,佢一直以黎都覺得我好好,有介紹比佢父母朋友人認識,但突然有一星期無主動搵我,然後再丟個︰「我同你再唔可以好似以前咁樣好開心咁無話不談喇。」之後就拍拍屁股走左。


我當時真係呆晒,但我仍然都回佢︰「無問題」。


上個男朋友(追我追一個月,一齊一個月,冷戰一個月,又係總共3個月貨仔)。我以為唔好咁快同男人上床,等佢追耐D,女人咁樣先叫馨香,每日同佢msg 來往,不斷咁讚佢所做一切(因為佢好大男人),好似個小fans 咁仰慕佢,等到時間差唔多,我say yes 同佢一齊,再拖兩個星期先上床,但係,被人食完之後一個月之後就飛甩我喇,嗚。佢話佢返工好忙,每日12 個鐘,我聽到心裡面諗︰「追我嗰時唔見你咁講?食緊我嗰時你每朝六點幾開車送我返工又唔見你話累?」但把口仍然都講︰「你唔需要擔心我,我明白你返工好累。」跟住,就無再見過佢嘅人影喇。
 
我唔識死纏爛打,每次feel 到唔對路就同自己講︰「算啦,又衰左喇。」但把口咁講啫,心裡仍然會受傷。你估我唔想好似傅穎咁樣嬲到周圍唱個男人點點點咩,我都會喺心裡面諗幾句「死仔包飛甩我,我要報仇呀!」但係我太細膽又懶惰,每次只會諗下就算。
 
我有嘗試同我D 女性朋友問︰「到底我問題喺邊?」佢地只會講︰「你已經盡全力對人好,係D 男人唔珍惜你啫。」(呢句野雖然好行,但我接受亦認同)。再問我D男性知己︰「到底我問題喺邊」,佢地只會答︰「早知道你咁寂寞,當初同我一齊就唔使搞到依家咁啦,唔好諗咁多,快D搵過第二個。」(我OS︰問非所答)
 
我死諗爛諗,到底係咪我被男人嘅感覺太容易可以放手?個性OK=無手尾跟?個樣唔差=我就算飛左你,你都好易識第二個?廚藝OK=只不過係免費餐廳,食完坐低傾兩句,咪散會囉?床上技術=你一定身經百戰喇,點娶你呀?
 
貽興,係咪我諗野太灰暗?我好想搵個長久嘅男朋友呀,定係我咁要求已經算太高?


你會唔會回我︰「你有得換男朋友已經算好喇,你望下你身邊嘅女朋友,仲有好多人坐緊爛(冷)板櫈,拖都未拍過呀!」
 
唔想咁樣,可以點樣呀:D

唔想咁樣,可以點樣呀:D︰


假設你說的都是真話,即是說你的樣貌和身材都不賴,也努力根據坊間的女人手冊做足一個好女人的條件,懂得討男人歡心,那為什麼還是無法修成正果?


1. 你條命生成係咁,幾好都冇用
2. 時機未到,你再好都係枉然


老實說,我也遇過好些像你這樣的男人或者女人,明明條件很好,樂意付出,偏偏他們遇到的也總是不懂珍惜。可說也奇怪,這些人雖然條件好,可他們選擇伴侶的眼光卻不一定好,那些外人看來很匹配的他們沒有選上,大家眼中的爛人或者扮嘢王他們卻懵盛盛以為是筍盤,死心塌地,結果,不又不是重覆你的命運,死得不明不白?


一件好貨色,也得放在合適的地方,遇到懂得欣賞的人,其價值才能被彰顯。你是雨花台石,卻只懂把自己放在金魚街,讓一堆來買石春放魚缸的金魚佬去選,你再好又怎樣?以他們的知識和水平怎懂得欣賞?你再出色也是枉然啦。


所以不要先否定自己。如果自己真的沒有錯,更加不要輕易為了遷就巿場而扭曲自己。先問問自己想要怎樣的男人?


合適的對象不一定是上天跌下來給你的,有時候是需要在適合的場所才能遇上的,就像那些RPG 遊戲,不在合適的地方找,寶物就不可能找到,也不可能過關,或者遇上應該遇上的人,發生應該發生的事……


想要哪樣的男人,就到哪裡釣魚去。如果你的朋友圈你的交友質素就只是遇上那樣的男人,我勸你還是快快增值自己,擴圈眼光和圈子,及早離開刻下身處的井底。


祝  不再埳井


貽興

advertisement
Something is wrong.
Instagram token error.
Load More