深雪︰
你好呀！容許我用口語化吧。
我今年24 歲，有一個拍咗6 年半拖嘅男朋友，我一直視佢為我嘅結婚對象，直到同事A 先生的出現。
記得第一日認識A 先生，睇到佢咗手嘅無名指戴咗戒指，但係佢一見到我就將隻戒指放喺食指，直到同事喺公司講他的女朋友，他知穩（隱）瞞唔到。佢女朋友唔喺香港住，每一日返工佢都用whats app 同講電話來往，有時喺我面前同佢講電話，不過佢會特登行開。
之後剛認識他第一個月，我地每一日都有用text messages 來往。
兩個月後，我地一齊去咗個朋友飲酒嘅生日party，他堅持要送我返屋企。就喺送我返屋企途中，我哋就擁吻啦。我好清楚當時佢無飲醉，有同佢講︰「你有女朋友架！」佢話︰「我有女朋友咩？」 我當時亦有叫佢去處理問題，兩個沒有feel嘅人係唔會無啦啦擁吻嘅。
第二日，我男朋友打電話俾我，我都無聽，當時我真係唔知點樣去處理。第三日，我男朋友打去公司，一個女同事接聽咗，好大聲話係我男朋友打嚟，我亦都刻意好大聲話︰「係呀，不過分咗手。」
我唔知佢係唔係出於內疚， 聖誕節同情人節都有送禮物俾我，之後佢話去睇戲，我都有去。自從情人節之後，我地每一日放工都會錫下摟下，那種感覺就好似陳奕迅《無人之境》入面歌詞嘅形容，好似唔可以無咗大家，但時間錯誤咗。有人話，一個kiss 可以睇得出一個人有幾鍾意你。
之後佢放兩個禮拜大假，同女朋友慶祝生日，仲買咗一個過萬蚊嘅袋做生日禮物。我同自己講係時候醒啦，任性夠啦。當佢（放）完假返嚟，我好努力同佢做朋友，佢有時會無啦啦拖我，但係我會叫佢放手。
但係最近我心軟啦，當我顧及佢女朋友嘅感受嘅同時，無人理會我架。不得不承認，有時愛真係自私。而家每逢五六日，佢都會text問我喺邊、做緊咩，有時喺公司搭lift得我哋兩個人嘅時候，都會錫下摟下。
有一次（佢）問我係唔係同佢好朋友去食飯，我話想知就問你好朋友啦。佢話而家係問跟（緊）我，不斷問，直到佢好朋友喺公司暗示我地無可能。最近有一次上咗佢屋企坐，因為放工等屋企人食飯，而佢屋企喺公司附近，期間認識咗佢爸爸，感覺好怪，我又唔係佢女朋友，而且佢爸爸係認識佢女朋友嘅。
其實佢係利用我代替佢女朋友，亦或睇定咗先做決定，亦或佢係好勝？我睇得出佢好鍾意佢女朋友，每日放工都會報到，連食煙都食當地嘅牌子。
就呢件事，我問過佢嘅男性好朋友，佢話︰「長途嘅感情只不過大家係到詭詭（呃呃）氹氹。」另一個我嘅男性好朋友就話佢係想keep 住我。
我明白如果同我男朋友結婚，生活會無憂，因為家境的關係。但係同佢一齊，我會好擔心做咗佢而家女朋友嘅角色。如果好認真同佢傾呢件事，佢會唔出聲。
我真係好想好好處理呢件事。Thanks in advance!
心急人
心急人︰
我只看到一個處理方法，那就是，與你的男朋友繼續正常發展，甚至結婚生仔。而這個男同事，就是玩偷情遊戲的對象。
當一個女人同時候有兩個男人時，你要懂得分輕重和處理，要不然，你就無資格擁有兩個男人。
你可以把自己想象為男性，男人有正印之餘，也常常有阿二阿三，當身邊伴侶多於一人，就要懂得如何處理。
你的那位男同事，明顯就是想要兩個女朋友，你也清楚，他好喜歡正印女朋友。基本上，他和你的情況一模一樣，大家都喜歡自己的正印，但又想在外面有多一個。
你飛不掉這個男同事，那麼，你就視他為愛情遊戲的對象吧！你和他，正在玩一個四角關係的遊戲，而這種心態，就是唯一合理的心態。
男同事無話過要與正印女友分手，而以他的個性，就算讓你做了正印，你都會好辛苦，因為，他永遠都需要多過一個女朋友。
你要好好珍惜自己的男朋友。你都知道，找個值得嫁的男人，好難好難。
因此，大前題就是，你玩還玩，要以男朋友為重，因為這個好男人，你將來要嫁給他。
而男同事這一種，不過是遊戲式的情人型格，你在結了婚後，會繼續遇上，千千萬萬個都有！
深雪
