advertisement

貽興︰

有一件事已經煩憂了我很久,我很想你能夠可以鬧醒我。
 
我本身有一個拍了差不多10年的男友,男友2年前已跟我求婚,結婚相也拍了,佢亦打算跟我今年內結婚,但我一直採取拖字缺,因為我男友本身比較大男人,很多事情也覺得自己是o岩,我永遠都係錯,還有佢覺得娶我回去我就要照顧佢爸爸,縱使我要加班,也要特登到街市買餸煮飯給佢o地食,就算街市關了,也要到燒味舖買一些預先煮好的餸,然後買點菜再回家煮飯給佢o地吃。

為這些問題我o地已經吵了很多次,因為咁樣我係佢工人,並不是佢老婆,呢個亦都係我一直採取拖字缺o既原因。
 
2年前我在興趣班認識了一個男仔A先生,開始時跟佢只是普通閒談,沒有深入的話題,之後慢慢對佢有些好感,但之後知道佢有女友之後就將好感放o係心(因為佢同女友也是拍了差不多10年拖)。
 
事隔半年後,我o既公司搬到另一區,lunch time時撞到A先生,先知道大家也是在附近工作,之後間中都有約出來食lunch。除o左工作o既事,大家都會談自己另一半o既事。

原來佢o既女友都係一個大女人,經常要求佢做呢樣做o個樣,又check電話睇佢同邊個SMS,小小事都會鬧佢鬧到狗血淋頭,所以佢成日都好(唔)開心。可能因為大家o既伴侶都係大男人/大女人,所以有共鳴,之後我地就慢慢就走在一起。
 
在新年o個時,我男友因為某d事同我講分手,還講左好多hurt我o既說話,仲o係我d親戚面前講我是非,我就覺得呢個男人係唔值得同佢結婚,就算結左婚都會同佢離婚,因為大家諗o野都好唔同。但過左幾日他要求復合,我心軟應承,但拉扯1個月之後,我正式同佢講分手,一來我覺得無辦法跟他結婚,二來我真係愛上o左A先生。
 
之後我就同A先生繼續暗地裡發展。由於佢女友看得佢好緊,所以佢一有時間就會陪我。雖然可能得半個鐘,但我都好開心。

但開心o既日子並不長,因為A先生要同他女友求婚,而他女友亦都答應o左。 A先生曾經跟我說過他女友是他生命中最重要的人,佢睇到佢同佢女友係有將來,所以同佢結婚,而我是他最愛的人,佢會一生一世都愛我。
 
到今天我同A先生一齊已經半年,而佢亦都忙著搞wedding的事。搞wedding時遇到不開心o既事也會同我講,佢成日都不經意會講到佢女友,我係好唔開心,但我當時o既反應只能是唔出聲。他睇到我o既表情就會講「我o地唔好再講呢d」,但過一陣佢又會無意間講起佢女友。
 
A先生同我講,同我一齊令佢改變o左好多,令佢開心同樂觀o左好多。因為我同佢女友係完全相反o既人。
 
貽興,我想問呢個男人究竟係咪真心愛我?定係佢只係當我係後備?同埋點解佢明明話同佢女友一齊唔係咁開心,但都要同佢結婚?
 
其實我好多朋友都覺得我係俾人玩,慢慢我都覺得係。希望貽興你能夠鬧醒我。Thanks!
 
小P

小P:

世上有各種各樣的女人成為小三,而這些小三,都不約而同相信她的男人最愛的人其實是她,比正印更愛。

如果小三也有不可動搖、能稱為信念的東西的話,這大概就是了。

小P,用你的腦袋想想看(如果你真的有的話)。A先生不是被女友迫婚,而是他主動向對方求婚。聽清楚了嗎?主‧動。如果你怕死,你會主動去死嗎?如果你不喜歡扒糞,會主動把糞便放入口嗎?

他自然是愛她的,他愛她肯定比你想像還要多,他愛她多過他愛你。

如何看得出一個人愛誰比較多?看他對哪個比較主動,看他經常不經意提著誰便一清二楚了。這些細節,瞞不到人。

如果你願意相信那男人的鬼話,就証明你只屬於這種程度的女人,男人只需用這程度的謊話廢話就能治得你妥妥貼貼。你真的甘心自己在他面前當個揮之即來,易騙易食的小三嗎?如果你真懂得愛情是先懂得愛自己才有資格被人愛,你就知道自己該怎麼做。

他需要的,說穿了不過是一個跟正印相反的女人,讓他能夠品嚐截然不同的味道,既要麻辣沙嗲湯底,亦要清湯補位。那個人,不一定是你,不過是你夠蠢,又就手罷了。

不要再用那些坊間中學雞的港男港女思維去思考愛情,整天價在懷疑是不是人玩你。有什麼好玩呢,如果真的有玩,那也不過是你自己作賤自己,你自己玩死自己。

愛情不過是你情我願的交易。你要演戲劇性淒美女主角,你要當時下流行的小三,他要享齊人之福,各取所需,誰玩誰了?誰也不欠誰。

當小三不是問題。不過是個人選擇。然而當一個蠢的小三,會讓世上萬千像我這些找不到小三的男人咬牙切齒。

祝  告別小三

貽興