爭取幸福有時不得不做壞事 – 覆又一個第三者

貽興︰

希望你可以抽時間解答我的來信,萬分感激!

我同我男朋友一齊o左半年(我地都未夠30,佢大我4 年),不過我係一個第三者。

我o地係工作關係而識的(我地現時都唔o係香港做o野),因為我o地工作上有 common friends,一開始都係成班人一齊出去,不過好快我同佢就熟絡o左,變o左好多時出去都只係我地兩個,甚至乎我地夜晚會去對方屋企叫外賣一齊食。


這種關係一路維持o左幾個月,我知道我o地對對方都有好感,但係大家都冇踏出第一步或者任何o野,而我同佢一齊亦都覺得好舒服,所以亦都冇諗住要刻意去發展任何o野,諗住一切順其自然。

有一晚我o地o係佢屋企食完外賣傾偈傾到好夜,佢o錫左我同埋我o地發生o左關係,事後佢同我講佢想同我一齊,但係其實佢o係香港有個女朋友,佢問我可唔可以接受同佢一齊。

我當時第一個反應係呆o左,因為我o地成日都一齊,但係我從來都唔覺佢有女朋友。佢可以成日個電話都唔響,佢電腦入面的相(佢全部有比我睇過)都冇幾多張係同女仔影的。

我諗o左幾日,都係決定同佢一齊。當時我諗,反正我o地又唔o係香港,又冇咩後顧之憂,一齊o左先算啦。

一齊o左之後佢對我好好,我地好多o野都好夾,夾到我地自己都唔信(老土講句,其他人都覺得郎才女貌那種),所以這半年大家真係好開心(直到現時都係)。

我地一齊o左冇幾耐大家就越黎越忙,所以weekdays 好少見面,但係一定晚晚傾電話;weekends 就一定一齊過。我地永遠都好似有講唔完的話題,開心與唔開心的o野我地都會同大家講,屋企朋友往事咩都可以講,咩都可以商量,所以係這大半年時間入面我o地已經變得幾了解對方,佢亦都係我之前咁多個男朋友入面令我覺得最開心最舒服的一個。

一直以o黎我都冇問過佢女朋友的事,佢亦都唔會o係我面前提,但係我同佢一齊咁耐,真係冇見過佢講過一個唔比得我聽的電話,我覺得好奇怪,但係一路都冇問。

一開始係我以為佢係因為冇女朋友o係身邊,佢想搵人消磨時間所以先想同我一齊,甚至乎我更加有諗過佢只不過係想搵個人上床;但係同佢一齊o左之後,佢實在冇o野可以比我挑剔,所以我不知不覺就放o左好多感情落去。因為我地真係太夾,一齊真係好開心,加上憑我這大半年以o黎對佢的了解(雖然唔係好長時間),佢真係唔似一個冇本心的人。

不過問題就在於,過多幾個月我地做緊的這個project 就會完,我地就要返香港。

大約一個月之前,有一晚佢突然之間問我,如果我o地做返普通朋友會點。當時有一刻我好想好想喊,但係我冇,因為唔想比到壓力佢,但係我亦都好老實咁同佢講我答佢唔到(我地之間真係咩都可以講),佢知道我呆左,攬得我好實,叫我唔好亂諗o野,佢話佢都係問下。

但係講真呀貽興,佢無緣無故咁問,我可以唔亂諗?

但係那晚之後佢仍然對我好好,只要我唔諗佢問過這個問題,我地仍然係好開心,咩都冇變過。

其實我真係好想問佢,到底佢會唔會同佢女朋友分手,又或者我地返到香港之後會點,但係我問唔出。

一路以o黎我o地從來都唔會講這個女仔,所以我對佢o地兩個的關係真係一無所知,但係佢那晚咁樣問完之後,我真係好驚,驚佢已經決定o左會放棄我。

你點睇?

又一個第三者



又一個第三者︰

一個女仔,除非真的心甘命抵一世做人第三者(我諗呢個可能性都好低),否則,都一定會想盡辦法,坐正。

不必理會那些爬上道德高地苛責他人的衛道之士,有時做第三者不過只是戀上一個人的先後問題,跟是否深愛未必有關,只要你和他都認為跟對方是命中註定的唯一,就應該勇敢捍衛你的愛情,就算跟全世界為敵,都有挺身迎向的覺悟。

把不光采的開頭,盡快轉變為光明正大,從地下爬回地面吧。

如果我是你,我就會好好想清楚,如何令他放棄他的隱形女友,跟你一起。

讓男人放棄元配的方法,你們女生比我更多招數,我也不必班門弄斧,我只想說一句,有時,男人真的要迫一迫才行的。你放任他繼續左右逢源,他當然不去會抉擇和放棄,所以,適當時候,你就得出手。

先視乎你的男友是何種性格的人吧。有些男人,總是要人踢一腳才動一下;有些男人需要女人做主食住;有些男人,對扮可憐扮綿羊的女生最沒輒。

你是女生,這些對你來說,都不難吧。

我知道這是個很困難的決定,但如果你們一起已經是錯,你唯一能做的,就是不讓它錯下去,或者,你趕走她成為他的唯一;或者,你主動離開,成全他倆。

你會怎麼選?

手段不光采,但得到幸福;手段光明磊落,卻可能錯過一世唯一的幸福。

確認自己怎麼做之前,讓我告訴你一點歷史小規律吧:行善的皇帝往往可能為人民帶來惡果,行惡的皇帝也可能撥亂反正成功管治天下?李世民得天下前的手段都很卑鄙,他也殺了不少親兄弟,可是,他登基後,卻成了史上最出色最受稱頌的好皇帝。

我想說的,你明白嗎?

祝 黃袍加身

貽興

advertisement
Something is wrong.
Instagram token error.
Load More