嫖妓的未婚夫 – 覆迷惘的K

貽興︰

你好。我係一個待嫁的32 歲女人,年尾就係我大日子,但近來我好矛盾,每日都o係度諗其實應否結婚!

我同我bf 認識了兩年,大家本身係同事,拍左拖1年左右就同居,o係今年年頭就計劃結婚了。佢對我好好,同我屋企人都好夾,我 地看來係令人羡慕的一對。

本來o係我心目中佢係一個好好o既男人,我好希望同佢白頭到老,但我一件事令我懷疑,就算我同佢結婚之後都會有離婚的一天。



o係舊年年尾開始,我發現每當我睡o左時,佢就會上網睇色情網頁,仲會去睇D 討論深圳按摩、嫖妓的分享。當時我好嬲,點解佢平時就算同我一齊都好似正經咁?同埋佢同我都有正常性生活,都會有興趣去呢?

後來有一日,我仲發現佢個同事(係單身男子)網上討論緊第二日會去深圳嫖妓的留言。o個一刻我真係受o左好大刺激,我好心疼,我真係忍唔住大喊起o黎。

當佢見到我喊時,就走o黎問我咩事,我問佢第二日去邊,佢o個刻個樣好驚,佢知道我好似已經知道o左咁。佢就話本o黎約o左同事上大陸買o野,因為怕我會懷疑佢唔開心,所以就冇話我知,o個刻我真係好想講出o黎,但我又唔想比佢知我偷睇佢D
o野,同理我唔想講出野(o黎)就會鬧大,所以冇講到。

跟住佢就應承我取消行程,雖然到最後我知道佢真係冇去到,係留
o左o係屋企,但我已經對佢開始失去信心。

之後我地大家都冇再提依件事,仲繼續籌備結婚o添。

o係人前,我好似好開心咁準備結婚。身邊D 屋企人、朋友仲為辦喜事,個個都好開心。但o係我心中仲係有條剌,我好擔心將來係咪重會咁o既事件發生呢?

我究竟應該同唔同依個人結婚呢?究竟我係咩(咪)真係會幸福呢?我係咪應該同佢傾下呢?

依段日子,我真係好迷惘,希望你會比到意見我啦!

迷惘的K



迷惘的K︰

其實,我最先應該做的,是問自己,究竟,你了不了解男人。

從生理學角度來看,男人,平均每隔6 秒左右就會聯想到性。沒有男人不對女友以外的女人有過性幻想性衝動,如果你要統計一個男人一星期勃起的次數,當中只有多少次跟你有關,女人知道了,會很沒趣,也很難過的。

我絕對不是為男人辯護,但是,你的未婚夫,在我所理解的男人裡,已經不算最衰那一群,僅屬中等,比他更爛更愛滾更賤的,大把。他不過是做了普遍男人都會做的事情,即使你無法接受這樣的男人,不結婚,分手,另覓他人,那個看來很老實很好的男人,很可能一樣都會召妓?分別或者只是婚後,或者一直有做,不過手法高明,不讓你發現而已。

K,如果你內心真的很介意,就不要強迫自己為了各種現實因素跟這個人結婚吧,但我可以告訴你,接下來,你遇到的,可能跟你的未婚夫沒甚麼分別,可能只是一個用錢買性,另一個,卻是出錢出力溝埋女。

你更應該做的,是認清楚男人究竟是怎麼一回事。很多女人明知男人會偷偷上鹹網,背著她看AV自瀆,甚至偷偷召妓、偷食,也仍然會繼續溝仔繼續期待婚姻,因為,男人和女人,都各自千瘡百孔,大家也不過是像張愛玲所說,各有各的缺點,相就著過日子而已。

畢竟都已經32 歲了。別要再天真,好好認清自己究竟活在一個怎樣的世界吧。

祝 不再天真

貽興

advertisement
Something is wrong.
Instagram token error.
Load More