唔定性的男人與唔忿氣的女人 – 覆兔仔牙

Hing︰

你好。我有睇過你幾本書,我亦都明白到好多男女關係o既o野。因為我一直有咩愛情問題都只係會同身邊最好o既女仔朋友傾訴,佢地o既觀點都同我一樣,所以我想聽聽男性
o既睇法。

我係o係外國o既,我同男朋友一齊差唔多3 年喇,我好愛佢,而佢亦都一直對我好好,我要乜o野佢都俾到我。不過佢好任性,好鐘(鍾)意玩,因為佢身邊好多朋友,成日出去玩,唔會避忌同其他女仔玩。而我係一個比較靜o既女仔,好少同佢一齊去玩。

呢一年開始我地多o左嗌交,我知好多時都係我開頭先,我唔鐘(鍾)意佢同D 女仔咁


close。每次就算係我錯定係佢錯,最後都係我call返佢搵返佢之後就無事。因為我好心軟,佢亦都知我無o左佢唔得,所以佢開始唔聽我講,自己想點就點。

最近,我發現佢同一個香港女仔MSN,內容好曖昧。因為佢有過前科,所以我忍唔到唔check 佢MSN。佢之前都有應承過我唔再同o個個女仔MSN,就係因為咁,我o地又吵;佢有call
返我,但因為我真係好嬲所以我無聽佢電話。佢因為我唔聽佢電話而嬲o左我,仲話要分開下。

我覺得佢好小朋友,點解咁小事就要分開?難道我嬲o下唔聽電話都唔得?佢以前嬲我唔聽我電話就得?好唔公平!仲話因為佢係男仔,同佢一齊就要遷就佢,但其實我已經好就佢。我知我check

o野唔o岩,所以我有認錯,仲嘗試去「tum」返佢,但佢都唔接受。佢話要冷靜下,要我得閒call o下佢,佢心情好o既時候先見面。Call

o左幾次之後都係一樣,所以我決定唔搵佢喇,等佢搵返我。我再咁搵佢,佢只會覺得我煩。

一個星期後佢搵返我,不但無say sorry,而仲當無事發生咁。(佢份人成日都係咁,唔成熟、唔認真、成日玩玩下咁。)但佢無話o係返埋一齊。當初係佢自己話各有各玩,我唔可以管佢,但當佢知我落club,佢又有意見,又話佢鐘(鍾)意幾時管就幾時管。

好奇怪o既係,我地就o黎返香港,佢叫我去佢屋企住,仲話同我去旅行,但都無表明o係返一齊。之後有一日,我因為好唔開心飲醉o左,去o左佢屋企過夜。我地有性愛,本來我以為會無事,但事實唔係咁樣。過夜後第2日,佢依然話要靜o下,做下single,俾佢去玩o下。一個月從香港返o黎後先決定要唔要o係返埋一齊。

我越來越唔了解佢,唔知佢諗緊乜o野。我又忍唔住要check 佢MSN,我發現佢同o個個女仔o既對話依然咁曖昧。佢地仲有傾電話。其實佢o地o係之前o係香港識o左2
個禮拜,都係出o黎玩。佢會唔會今次返香港就同o個個女仔一齊呢?玩夠喇,返黎就同返我一齊?返o左o黎又會唔會再同o個個女仔MSN?咁咪既(即)係一腳搭兩船?

我應該點算好?我唔想失去佢。難道我真係要俾佢玩一個月,同第二個人一齊?你可唔可以俾D 意見我?

其實平時仲有好多小事因為佢咁唔認真o既性格而產生o左好多問題。好多時都係我自己唔開心、喊,但佢感受唔到,完全無改過。我成日都唔信佢,係因為佢好多o野都好兒戲、唔認真。我做乜o野,都會諗過佢先。我會同自己講我已經有男朋友,我唔會同其他男仔咁close,但點解佢唔可以為我改o下呢?呢2年幾,我為佢改o左唔少,但佢一直都無改!明知自己錯都唔會認。

希望你可以幫到我啦。Thank You!

兔仔牙



兔仔牙︰

其實你應該好清楚,你同你男友,根本就越行越遠。

佢越大越鍾意玩,佢最想可以晚晚換伴,你就只想對住佢一個,咁
o既關係,可以勉強維持幾耐?

用最老土o個句問你,你困得住佢個人,又困得住佢個心咩?你可以犧牲自己下半世,日日廿四小時睇實佢咩?

要一個貪玩唔想安定o既男人突然轉性只對住你一個,同要求地球突然向相反方向自轉一樣,都係冇可能o既事。依家擺到明佢食住晒你,你嬲佢都完全唔緊張,衰在佢返?你又o下o下開門比佢喎,你又繼續肯同佢造愛喎,我係o個個男人,都唔稀罕你啦。理鬼得你把口嘈咩鬼,你嘈我咪行開o羅,玩到?咪返o黎換件衫沖個涼o羅。

如果你希望自己今後o既人生就係咁,你就繼續同佢糾纏啦。不過我可以話你知,你千祈唔好天真到以為可以等到佢浪子回頭、修心養性,到佢60 歲不舉性無能,佢都可能仍然會四圍撩後生女,或者響公園茶樓flirt阿婆。

點解一定冇佢唔得?點解唔可以放手,搵個真正適合你o既人?你鍾意靜,鍾意一對一,咪搵個同你有相同諗法o既人o羅,點解係都要浪費無謂心力同眼淚,扭曲一個人o既本性?

再咁落去,只會兩敗俱傷。

或者,得你一個,遍體鱗傷。

祝 if you love him, set him free.

貽興

advertisement
Something is wrong.
Instagram token error.
Load More