點做第三者 – 覆阿A

貽興︰

雖然我唔係一開始以(已)經知道對方有女朋友,亦都唔係被佢拍完手機照片,然後強迫在一齊。我只能講,我很愛很愛這一位有女朋友的男人。

由始至終,我都無問過對方o既另一半任何事。所以,我知道o既o野只有︰呢個男人o既另一半,一年大約出現4 次以下,每次出現時間最長一個月,最少一星期,一年365
日,有3/4 時間,係我倍(陪)住呢位男人。

最初,我由自己扼(呃)自己︰我先係佢女朋友,佢只係出去玩下o者。變到我接受,但係仍然唔開心。但到現在,我只係想,呢位男人唔好擔心我,只要佢幸福,我就足夠。



但點樣先可以比到佢幸福?前o個掛(排)佢知道佢另一半要返o黎,我知道佢將呢個消息收埋o係心裡面幾日,佢變得沈默,呢種沈默o既感覺,我真係非常了解,因為當佢將個消息轉告我o既時侯,會同樣出現o係我身上,然後我個心好疼,唔係為自己疼,係為佢疼,佢比我早幾日承受。

我只係要take care 自己就OK,佢要諗我感受,佢自己亦相同唔好過。Sorry 正印o個份心情,如果話我自己都諗埋就太假,所以唔提。哈哈!

我應該點樣先可以比到個最令佢放心o既感覺?大家都係個敏感o既人,亦好顧慮對方感受,我係相信︰一個男人,可以同時愛兩個人。當然我亦知道,我係個代替品啦!

我唔係進取o既人,無試過要爭,無試過o係唔應該o既時間出現,但我覺得自己仍然唔足夠,好想好想佢連細少o既沈默都唔會出現,我係咪好自私?

人總有情緒,但我只想佢有開心o既一面,唔想佢o既唔開心係為我而起。

講到底我要點做先可以做得更好?o個種更好,係令到對方無負擔o既好。就算叫我做任何o野都OK,只要對方覺得好,我就可以。

阿A



阿A︰

其實,越o黎越多人,唔介意自己係第三者。只要開心就得,要求咁多,盞煩。

不過,好多人,做第三者只係一個step,好似返一份工咁,做住先,將來跳上去,升上去,第三者,暫時o既o者。

可以好似你咁,咁安份,咁唔大貪,仲細心到為個男人諗埋,想知道點樣做一個好o既第三者,就真係萬中無一。

好少人可以唔會得一想二。好多人起初都係同自己講,第唔第三者冇所謂,佢愛我就得。但大時大節,或者某D細位,拮到佢地,慢慢,佢地就唔甘心要同人分,因為越o黎越愛,越愛,就越想完全佔有。

其實做一個好o既第三者好簡單,只要你唔貪,唔得寸進尺,已經成功o左一大半。一個好o既第三者,係唔會煩另一半究竟打算幾時同
o個個人分手,唔會問我o地依家究竟算咩關係,唔會突然間情緒波動覺得自己好cheap好蠢,總之,就唔會煩到人,永遠開朗溫柔,另一半見到佢o既時候,永無油煙味,唔需要為柴米油鹽瑣碎事擔心,咁,就係最稱職又最完美o既第三者。

即係話,簡單o黎講,做一個好o既第三者,最重要係,唔好問咁多問題。

越多問題,就越令大家冇癮,令雙方煩惱。

不過,話說回來,一個可以做到咁出色咁完美o既女人,又洗唔洗要做第三者?

呢個,似乎又係另一個更值得思考o既問題。

祝 永遠安分

貽興

advertisement
Something is wrong.
Instagram token error.
Load More