最好已經是這樣 – Agnes

貽興︰

一直都有追看你呢個 「興談戀事」,實在令我了解多o左男人o既諗法。諗o左好耐,驚
o左好耐,終於有勇氣打呢封信俾你,唔知有冇機會可以得到你o既答覆同建議呢?

其實,兩個人之間o既信任,真係好緊要o架可?我自己都知,但係,我總係成日對我男朋友疑神疑鬼。佢一電話響,我就好心急想知道係邊個搵佢;佢話約o左個男性朋友食飯,我又會形住佢係呃我,其實係同女仔食飯。

可能上年俾我發現過佢同一個女仔好似有d野,有keep 住SMS 同埋襯我返工o既時候講電話,實在深受打擊。佢應承我唔再同佢


contact,但係俾我發現仲有。喊過無數咁多次,佢都有道歉,呢件事終於叫做過o左去,直到今日,少少o野都仲會令我諗起。好彩,最近呢半年,眼見o既應該真係再冇聯絡了!

我其實都好想信佢多d,咁樣大家都應該會開心d,但係偏偏佢o既鬼祟行為總係會令到我懷疑佢。自己身處邊度又答唔出;一時又話放早,一時又話放夜;電話響,佢會側側地個電話去睇來電(好似驚我睇到咁)等等?

另外,成日都聽人講,同另一半經歷過一些大事先至會知道對方有幾緊張自己,更可能睇到佢o既處事能力。咁樣講,係因為大概每個人到主題公園玩o既時候都係開心啊,我認為唔可以單睇平時開心o既時刻就叫做大家好愛大家!!

最近因為屋企一 d 家事同屋企人連鬧幾日交,男朋友見過我兩次喊到收唔到聲咁返入房。佢本身訓著o左,望一望我同我講︰「咩事呀?唔好喊啦!」第二日只係問o左兩條好表面o既問題就當冇o左回事。其實成件事仲發生緊,我仲係好唔開心,佢都冇再問過我而家o既情況了!

唔知道,講左咁多「問題」之後,仲有冇可能結到婚呢可?我從小就好渴望有幸福美滿家庭(老實講,最好有d錢添啦),對於24 歲o既佢黎講,一定冇快將27
歲o既我咁著急。

曾經有問過佢有冇咩計劃,有冇諗過幾時結婚,佢帶我遊o左一陣花園就扯開左話題了。

我知道我媽咪好希望我可以嫁個有錢人,畢竟佢都係唔想我嫁o左人都仲要捱,只希望我可以幸福,繼而令到佢o既生活都有所改善。但係,就我男朋友而言,我暫時睇唔到佢會俾到點樣o既生活我,只有睇到將來一定係我去照顧佢,我做煮飯婆o個隻。

貽興呀貽興,你可唔可以就信任、處理大事同結婚呢兩3
個大煩惱而救救我呀?實不相瞞,我有諗過放手,放棄我男朋友,但係我又怕,怕原來佢已經係好好o既一個,我唔想「蘇格拉底 - 愛情與婚姻」o既故事會發生o係我身上啊!

Agnes

p.s. 當我打呢封信俾你既時候,我發覺平時好多o既小問題,原來都不足以嚴重到要我打出o黎問你!我最擔心o既,都係我地之間o既信任係咪已經毀壞o左,好難
build up 返啊。



Agnes︰

你o既煩惱,亦係大部分城中女仔o既煩惱。

心頭高,或者要求高,從來都唔係咩問題。問題在於,你有冇問過自己,有冇咁o既條件同能力得到一個你認為理想既對象?你又願意付出d咩o野去換返呢樣o野返o黎?

唔好賴咩你阿媽想你嫁個有錢人,你自己多少都有咁o既諗法,係想要就大方承認,連呢一點都要推諉他人,從呢一小處,已經可以見到你平時份人係點性格。

你依家最大o既問題唔係同你男友之間夠唔夠信任,又或者佢會唔會同你結婚,而係你本身o既要求問題。如果你真係覺得自己下半世唔應該只係配呢個男人,就唔好再拖泥帶水,又想佢同你結婚,但又明知佢照顧唔到你生活、你要o既唔係呢d
o野,咁點解仲要為啖氣咁樣蹉跎落去?你究竟知唔知道自己最大o既問題係咩?

關於蘇格拉底o既故事,講真,如果你最好o既男人已經係咁o既質素,我係你,唔要好過要啦,煩咩呢煩?唔肯踏出第一步,又點可能遇到更好呢?

o下o下都要寫包單先敢去馬,咁冇自信心,有好o野都比勇字當頭o既人搶o左先啦,幾時輪得到你?

祝 勇字當頭

貽興

advertisement
Something is wrong.
Instagram token error.
Load More