阿媽與女友 – 覆遇上老土的事的人

喜歡看你的散文。你對愛情見解獨到，一針見血。現有煩惱想問一下你的意見。

簡單d，我bf 個媽咪唔鍾意我。我bf 話咁樣同唔到我結婚，而我o地而家係LD 緊，咁點好？

佢一直係好傳統好聽屋企話o既人，加上佢媽咪因為發現o左佢老豆收埋o左個女人10 幾年，仲有個仔之後，變到個人好偏激，仲因為咁自殺過。佢驚如果唔理佢同我結婚o既話，佢mummy
又會癲，唔認佢做仔，同埋會全男家親戚唔o黎，佢話佢無得揀。

但係我bf 話如果佢mummy 真係唔肯，就真係唔可以。我有同我男友講過可以唔結婚或唔擺酒，但係佢唔肯。

而家好似咩都係未知之數，又LD 緊，keep 唔keep 到又唔知，又唔知佢mummy 會唔會接受我。每次諗就覺得好灰，睇唔到我o地前境，分分鐘我bf
會因為咁分手。唉?

我D 朋友個個都叫我搵個第二個，我又唔捨得，又做唔到一腳踏兩船。o係佢走左之後，都有人想追我，但係我連出（街）都唔想，好似對佢唔住咁，因為雖然而家係LD，但大家感情都幾好，都睇到佢係好努力咁去維繫。

另一方面，我其實又未想結婚住，可能幾年之後先決定結唔結。我有講過比我男友知我o既諗法，佢仲嬲。其實如果佢想結，都會結o既，不過而家好似比我bf
操縱住我地感情o既生死咁。

而家會諗住順其自然，咩都唔想諗，過得一日得一日，但係間唔中朋友問或諗起就唔知點好。

你的意見如何？

祝 情場得意

講真，如果佢好愛你，好著緊你，點會咁樣hea 你？又話唔知，但又唔諗想點，你提議o既解決方法，佢又全部話唔好，咁真係鬥命長，睇o下邊個頂唔順o乍喎?

雖然對男人o黎講，阿媽好重要，但如果佢真係想同你有將來，佢一定唔會咁對你。

依家你地遙距戀愛緊，第時係咪仲係呢個，冇人講得埋，可能佢覺得唔划算，你唔值佢同阿媽fight，所以先至咁對你。

所以，醒啦。

我諗你可以比最後機會佢，如果佢仲係答你唔知，咁你就早d 全身而退啦。呢種男人，我敢肯定，5 年後佢都一樣係咁，唔通你真係同佢阿媽鬥長命咩？

女人可以唔介意等，但唔可以等錯人。

貽興