網中人 – 覆檸茶

貽興︰

我同我男友一齊已2 個月了,時間唔算係好長,但係我地感情唔錯。我都見過佢屋企人,佢都願意帶我去見佢o既同事同埋親戚,o係佢D同事面前佢都表現到同我態度親暱和恩愛。不過我地之間差距最大o既係年齡,今年我19
歲,佢28 歲都o黎緊啦,但我地都甚少出現代溝o既,只係間唔中佢會覺得我思想唔夠成熟。

當初我地相識都係o係網上,果陣我唔知佢真實o既年齡,佢報細o左5年。後尾一齊o左佢先講佢真實o既歲數,不過我都唔介意。佢話佢咁講係因為佢怕我介意,嫌佢老,見佢對我坦白o左我都好開心。而一路以o黎我地之間發生o既事情,都令我覺得佢對我係好認真、專一、坦白。原因如下︰

我一直都有check 佢電腦,發覺佢電腦除左我o既相就已經無其他女仔o既相。有一天我竟發現存有我相片o既檔案給冊(刪)除了,取而代之o既係數個女仔o既相,跟住我好唔開心同喊,佢即刻「tum」返我同對我解釋,亦即時delete
晒所有o既網友女仔相。佢解釋電腦冇o左我D相o既檔案係因為我o地o既相佢都已經全部upload 晒上我o地o既相簿,而佢電腦都冇乜位save,所以先delete,最後我相信了。

又有另一次,我發現佢電腦有好多「咸網」。對於呢件事其實我係唔介意o既,因為我相信所有男人都係好色,都會有生理需要。但係不久後佢主動同我講,發覺自己唔應該繼續瀏覽色情網站,應該將D心思多D放係我身上先o岩,所以佢delete
晒所有色情網頁了。

但係近日比我發現佢有一樣o野,係我真的不能夠容忍的,就係發覺佢有上交友網識女仔&留言o既習慣。我都發現左一排啦,之前諗住隻眼開隻眼閉,期待佢總有一天會「收手」。但係隨著日子o既過來,我發覺原來佢冇打算暫停呢樣o野,於是我再忍無可忍之下開左一個新account
在網上同佢做朋友。

未add 佢之前,我曾經都同自己講,雖然佢上交友網識女仔,但可能佢只係因為悶,只是想搵人傾偈,別無他意。但係事實話o左比我知唔係咁樣,佢o係網上竟然同「我」偽裝o既身份調情,又問人拿電話,仲約人出街,我真係好驚訝!

其實依家每個weekend(sat & sun)我地都會出街拍拖o既,但呢個weekend 佢就想約「我」出去唱K,另邊廂佢同我講不如呢個星期唔好見,理由係話因為我要公開考試,唔想阻住我溫書。我好失望,難道一個感情要好o既女朋友真係比唔上一個只係識o左一日仲要素未謀面o既女仔?

貽興,我應該點做?他還愛我嗎?我應該扮唔知當無件事發生,繼續忍?定係拆穿佢o既所作所為?

其實佢仲係對我好好的,雖然一開始佢就已經有上網識女仔o既習慣,但佢對我o既態度從未改變。如果我拆穿佢的話,我怕後果一發不可收拾。雖(需)知決裂了的花瓶即使修復過去也會有痕跡。但如果當無事發生,我又唔甘心。另一方面,其實我好愛佢,我好怕失去佢!

希望貽興你可以比D中肯o既意見我吧!

祝 工作順利

檸茶



檸茶︰

如果你不是腐女,不是沒人要的賣剩蔗,幹嗎還要留在這樣的男人身邊?

至少,從你的來郵,我一樣他的優點都看不到。

男人看咸網沒有罪,他看是他的事;話說回來,你也不應該干涉他這種興趣。不過,他在網上四圍溝女,仲同另一個身分的你錯摸追逐,就有點好笑。

做男人做到咁,都真係幾抵死。

不過,女人如果有心set up,男人那麼笨,一定會中招的。

這種在網上胡亂撒網的漁翁,再好的女人留在他身邊都是浪費。比他更像樣的男人多的是,你不必留在他身邊呀。

快點找個像樣點的男人吧。

祝 無網之災

貽興

advertisement
Something is wrong.
Instagram token error.
Load More