advertisement

Dear Zita︰

如果一個男仔鍾意一個女仔(呢段感情未開始),但整整一個月都只是每日傾電話來維繫感情,朝早起身、放工、夜晚都打,電話內容都係關於每日的工作、發生過的事,又或者講一d甜言蜜語,例如有無掛住我、心裡面得你一個etc……但一個月內只約會過一次(不是單獨,係同埋佢的朋友一齊),之後就無再約個女仔。呢個

關係正常嗎?如果個男仔係鍾意自己,佢唔係應該好想見到個女仔嗎?

身邊d朋友成日問我︰「究竟你同佢點?佢有無約你出街?有無講過鍾意你?」我只係答︰「無乜特別,又係咁……」事實上真係無乜特別,都係咁,一個男仔追一個女仔,但只係傾電話,無約會,其實係咪代表個男仔只係玩玩下?根本無心去發展呢段感情呢?呢個男仔剛剛與女友分手大約2、3個月,佢會唔會當我係替身?或者係「貪就手」?

我好想知到底佢係點諗,因為我從未拍過拖,而自己又難得鍾意一個佢又好似鍾意自己的人,我唔想受到傷害……唔想失望……


Blue




Dear Blue︰

我認為這個人是「口講無憑」派,短期之內他不會給你幸福,似乎亦無打算如此。

他說他鍾意你,但他沒有讓你得到拍拖的享受,相反,令你心緒不寧,思前想後,這種男人,都幾懦弱。如果你與他拍拖,你一定會不開心。

既然他是如此,「得把口」無實際行動,如果我是你,我就以其人之道還治其人之身。我會日日在電話中告訴他我都好鍾意他,但他約我,我就左推右推。

有種男人是這樣的,他覺得你半推半就,才會真心想得到你。

又或是,你直情疏遠他,在電話中對他冷淡,他一找你,你就話︰「同朋友一齊,唔方便講。」如此這般,他反而想多見你。

他不認真,他不真正參與,你也要與他同一步伐,無需付出更多。

深雪覆