最終的決定 – 覆Kristy

 

深雪︰

首先,好多謝你解答我咁多次的問題,thanks!

我終於在平安夜當日和舊男友分左手,原因係自從出現第三者之後大家都放唔開,佢話我已經同以前唔同,冇再咁痴住佢、咁嗲佢,連我自己都唔開心,加上我應承新男友聖誕節完左就會解決所有野唔洗佢再等,既然


我個心係向住新男友,大家又唔開心,就乾脆了結左件事。

原本以為可以開開心心同新男友一齊,但自己開始覺得唔知點做,因為我覺得好自私,根本唔籍(值)得佢咁愛我!我照樣咁搵佢同佢講我同舊男友分左手,佢反而一些開心都冇,仲開始避我、唔聽我電話同唔覆我message(我搵佢其實係想俾份聖誕禮物佢)。我並冇嬲佢,係我自己做錯在先根本唔怪得人,有一次我忍唔住問佢係咪覺得我好煩,係咪唔想我再打比佢,佢又話唔係。果一刻我個心都知要放棄,冇錯我係好愛佢,但自己冇面再同佢一齊,再加上佢的冷淡態度,我個心真係好痛……

直到有一日,我直情拎埋份禮物出去比佢,打算送埋比佢我就完結我地既關係。但係打比佢果陣佢話佢打緊波唔得閒拎,我話咁我拎上你屋企放低比你個妹,佢開始發晒猛憎,我問多佢一次我係咪好煩,佢答我:係!那個moment真係hurt得好緊要。

收線後我一個人係咁行,我不停同自己講唔可以喊,最後一路行左幾個鐘流左四滴眼淚。12月31日我狼(狠)心打多次比佢決定比完佢之後一切都完唔再諗。1月1日佢終於出現,果晚佢話佢仲好愛我,但唔知點解冇信心可以同我好似以前咁開心,呢晚我知大家仲好愛大家,佢忍唔住拖住我隻手,仲錫左我好耐,那一刻我唔知自己做乜,明明好愛佢但佢錫住我果陣個心淨係諗番起佢話我好煩的說話……但真係好愛好愛佢,亦都諗住唔再搵佢,但當晚佢做既一切令我的決心卻步……

深雪,我好恨自己點解在感情上唔可以撇脫些,永遠都會心軟,說真的,很羨慕你可以好狠。


Kristy




Dear Kristy︰

你的新男朋友其實是態度差。態度差的人,你只有一個對策,就是不理會他,尤得他自己猛憎。

做人切忌被別人影響情緒,何苦呢?明明自己開開心心,卻被其他人搞到欲哭無淚。

我不是狠心,而是自我。我的自我很強,因此不容許有人令我不快樂。要發癲的話請他自己行開一邊,不要影響到我。

你又無做錯,他硬是要這樣古怪,就証明他為人唔成熟。

你卻步都好,你都無能力使自己的心安定到不被他影響的程度。因此,你的男朋友一定要是一名不會激到你紮紮跳的人。如果他日日激嬲你,不如自己一個更好。


深雪覆

 

advertisement
Something is wrong.
Instagram token error.
Load More