advertisement
《迷你兵團》真係好犀利，幾十粒Minions完全冇對白都可以令大家咁開心，而且佢個故事都係搵黎做，致在表現佢地有幾可愛。不過，當中有一樣野都幾有驚喜，就係佢選擇用1968年做背景，令我覺得佢根本係恐佈片。
1968年有咩特別？六十年代係美國反戰運動、黑人人權運動、Hippies文化、傳說中最強的音樂節Woodstock……基本上，好多歐美年輕人對於社會環境感到好絕望，繼而產生好多社會運動，不論係政治定文化，都好努力想建立新的制度同埋烏托邦。
你都見到Bob、Stuart同Kelvin遇到著住彩虹色衫的Hippies，仲參加Love& Peace遊行添。而且成套戲仲有好多真係同1968年有關的事件，Beatles影《Abbey Road》大碟封面（隻碟就係1969年出），見到美國人影登月相（1969年登月，咁如果真係造假，68年影相加堆執相就Fit晒！）
另外，成套戲大部份的配樂，都用咗六十年代極有代表性的音樂。人人都識唱幾句的〈Happy Together〉、The Doors、The Who、Rolling Stones。仲有當時同佢地鬥得難分難解的Beatles，當然仲有結他之王Jimi Hendrix。
不過，Minions係追隨邪惡的群體，而且係毫無理性地被邪惡吸引。呢套戲竟然將Minions同世界歷史的黑暗部份拉上關係－－佢有份參加戰爭、有份同埃及人一齊欺壓奴隸。最後，響1968，全世界都以為愛與和平會改變世界，年輕人將會建立更美好的生活時，Minions終於遇上新主人Gru，而且我地睇過《壞蛋獎門人》都知道，Gru係會響千禧年繼續做壞事。
唔知係導演因為六十年代有特色容易拍，定係特登咁諷刺：Minions就係一直欺負人類的幫兇。即使六十年代係充滿希望的時代，但因為Minions，人類並未得到Love&Peace，繼續跌入資本主義、貧富不均、環境等問題。而我地呢，「好打耳啊～」
