雪寶粉絲必去！台北「冰雪奇緣嘉年華」免費入場影靚相

今年聖誕想睇「雪」？又冇budge去北歐旅行？台北今年舉行全球首發嘅「冰雪奇緣嘉年華」，配合即將上映嘅迪士尼冰雪奇緣最新動畫短篇「雪寶的佳節冒險」，加埋12米高魔法聖誕樹，又真係幾吸引嘅！

今年嘅「冰雪奇緣嘉年華」，將會喺11月30日至下年1月14日，喺台北101嘅水舞廣場舉行，其中最吸引嘅係位於城鎮廣場中心、12米高嘅「冰晶魔法聖誕樹」！冰晶一樣嘅半透明葉片，加埋璀璨嘅燈光秀，好有「冰雪奇緣」裡嘅氣氛～

另外，喺銀白色嘅冰雪森林裡面，仲有座5米高嘅冰雪城堡，唔知喺裡面會唔會見到 Elsa呢？除咗呢啲經典場景，仲有由英國直送台北嘅戶外「冰雪溜冰場」、販售各式冰雪奇緣周邊商品嘅「小鎮市集」等等，無論係情侶去，定一家大細一齊去，都有嘢玩！

至於大家最關心嘅票價問題，係免費入場嘅！但要體驗活動就要買「體驗護照」，已經開售，大家可以去返 活動官網 查詢。不過小編就建議想輕鬆行下嘅話，就盡量避免喺正聖誕或者年尾果啲時間去喇～

圖片來源：台灣華特迪士尼